النوايا الطيبة .. متكفي !
كان عند بيت جدي امرية اساعد بيبي ( جدتي ) بأمور البيت
وكانت عايشة وياهم لان ماعدها احد ، ومن سافرت العائلة الي متكفلتها
هي رفضت السفر وياهم وطلبت من بيت جدي ان تبقى وياهم واتساعدهم
كان اسمها رضية هاي رضية كانت فارسية وادكٓش بكم كلمة عربي
بوقتها رحبوا بيها واتكفل جدي بيها من الالف الى الياء وصارت وحده من اهل البيت
بس كانت مشكلة رضية جدتي .. مكانت اتحبها لان بيبي كانت متقبل اذا اتقصر بشغلة لو تدخل بشؤون الاخرين لان هي كانت اتحب ( الكَرشَة ) والقال والقيل ..
بس كانت اتحب جدي هواية لان عمره ما سمعها كلمة اتغثها وخاصة هو رجال فميدخل بتفاصيل البيت هو دائما الوجه الحلوه للكل بس بيبي كان براسها التقويم وادارة شؤون البيت ..
بعد فترة لاحظ جدي انو ملابسه الي تغسلها رضية دائما تطلع وسخة من جوه اديها عكس ملابس بيبي كانت تلمع .. هو استغرب وكال لبيبي
بس اريد افتهم ليش رضية متغسل ملابسي عدل واني الي كلش اداريها ومعتبرها بنتي .. وانت الي اضوج منج ملابسج تلمع لمع .. لو هذا هم حظي ! بيبي بوقتها كالت اله لان انت ممنطيها العين الحمرة واذا اشوف شي اعوج متحجي امبدال مدكولي الي روح كولها الها ! ليش ملابسك تطلع وسخة ..
جدي بوقتها كال لبيبي لا خطية ما اريد اضوجها هاي يتيمة وماعدها احد .
وبقت ملابس جدي وسخة وملابس بيبي تلمع !
فديوم قرر جدي انو يراقب رضية من تغسل الملابس بعد ما طلعت روحه .. !
لاحظ رضية من تلزم ملابس بيبي تلزمها بعنف وتدعكها حيل وتحجي بالفارسي واسب واشتم بيها ..
ومن تلزم ملابسه تلزمها بكل رقة وحنان واتخاف تدعك ملابسة حيل لتروح اتأذي ! واسمع الملابس كلام حلو وكله حنية ..
من وقتها عرف جدي السر ..
ومن اني كبرت عرفت انو النوايا الطيبة متكفي لان راح تعمي البصيرة وادواتنا للوصول للهدف راح اتكون جدا ضعيفة هاي اذا كدرنا نوصل للهدف اصلا ..
الى رحمة الله يا رضية الطيبة .
منى الصراف - العراق
ليست هناك تعليقات:
إرسال تعليق