"" من غير عتاب ""
رأفت عبد العال
ما تقتليش الفرح جوايا
وما تعزفيش على جرحي وهوايا
نسيني يوم محصوله كله ذنوب
لسه جراحي مفتحة
جوه الحنين مروحة
ومين يطيب الجراح
والذكريات مصلوبه على باب الندا
جوه دروب النفس تنهش كل غالي
له بريق
مش كل شيئ يلمع نقول دهب
ولا كل مين يصرخ يكويه اللهب
ياما في جراح ينولد منها الغضب
وفي نفوس جواها سكن العطب
وقلوب كتير عطشانة وفا
وناس بتهدي المحبة وبتزرع دفا
اوعاكي مرة تتعجبي ولا تحسبي
ولا تمحي من قلبي الأنين
ده الأصل طين هيعيش ويرجع للتراب
من غير عتاب من غير جواب
الرحلة غنوتها ألم الرحلة غنوتها ألم
.
ليست هناك تعليقات:
إرسال تعليق